Isa 14 | NdeIBE | STEP | UJehova uzakuba lesihawu kuJakhobe; uzamkhetha njalo u-Israyeli, abahlalise elizweni labo. Abezizwe bazahlangana labo Bamanyane lendlu kaJakhobe.

Isaiah 14

1 UJehova uzakuba lesihawu kuJakhobe; uzamkhetha njalo u-Israyeli, abahlalise elizweni labo. Abezizwe bazahlangana labo Bamanyane lendlu kaJakhobe.

2 Izizwe zizabathatha zibase endaweni yabo. Indlu ka-Israyeli izathumba izizwe zibe yizisebenzi zesilisa lezesifazana elizweni likaJehova. Bazakwenza abathumbi babo babe yizigqili, babuse abacindezeli babo.

3 Ngosuku uJehova azaliphumuza ngalo ekuhluphekeni, lakunxakanxaka lasebugqilini obulesihluku, 4 lizakutsho la amazwi okukloloda enkosini yaseBhabhiloni lithi: Umcindezeli usefikile ekucineni, ukuthukuthela kwakhe sekuphelile!

5 UJehova useyephule intonga yababi, induku yobukhosi eyababusi,

6 abatshaya abantu ngokuthukuthela, langokugalela okungapheliyo, banqoba izizwe ngentukuthelo langokucindezela okungapheliyo.

7 Amazwe wonke alokuphumula lokuthula aphahluka ahlabelele izingoma.

8 Lezihlahla zamaphayini lemisedari yaseLebhanoni ziyathokoza ngawe zithi, “Njengoba khathesi usuwiselwe phansi akulamgamuli wezigodo ozakuzasigamula,” kutsho uJehova.

9 Ithuna ngaphansi liyanyakaza ukuba likuhlangabeze ekufikeni kwakho. Livusa imimoya yabafayo ukuba ikubingelele – bonke labo ababengababusi emhlabeni; libenza basukume ezihlalweni zabo zobukhosi – bonke labo ababengamakhosi ezizwe.

10 Bazaphendula bonke, bazakuthi kuwe, “Lawe usubuthakathaka njengathi, usube njengathi.”

11 Bonke ubukhosi bakho sebehliselwe phansi ethuneni, kanye lomsindo wamachacho akho. Impethu zendlaliwe ngaphansi kwakho, inhlavane zikwembesile.

12 Yeka ukuwa kwakho uvela ezulwini wena nkanyezi yekuseni, ndodana yokusa! Uphoselwe phansi emhlabeni, wena owake wehlisela izizwe phansi!

13 Wathi enhliziyweni yakho, “Ngizakwenyukela ezulwini, ngizaphakamisela isihlalo sami sobukhosi ngaphezu kwezinkanyezi zikaNkulunkulu. Ngizahlala ebukhosini phezu kwentaba yombuthano ezingqongweni zentaba engcwele.

14 Ngizakwenyukela ngaphezu kwezingqongo zamayezi; ngizazenza njengoPhezukonke.”

15 Kodwa ulethwe phansi ethuneni, ekuzikeni kwegodi.

16 Labo abakubonayo bakudonsela amehlo, bayacabanga ngowakudalelwayo bathi: “Nguyena lo na umuntu owanyikinya umhlaba wenza imibuso yaqhaqhazela,

17 umuntu owenza umhlaba waba lugwadule, owadiliza amadolobho awo kazavumela abathunjwayo bakhe ukubuyela ekhaya na?”

18 Wonke amakhosi alele ebukhosini, enye lenye ethuneni layo.

19 Kodwa wena uphoselwe ngaphandle kwethuna lakho njengogatsha olulahliweyo; welekwe ngababulawayo, lalabo abagwazwa ngenkemba, labo abahlela ematsheni egodi. Njengesidumbu esinyathelwe ngezinyawo,

20 kawuyikuhlangana labo ekungcwatshweni; ngoba usulichithile ilizwe lakho wabulala labantu bakini. Inzalo yababi kayiyikuqanjwa futhi.

21 Lungisa indawo yokubulalela amadodana akhe ngenxa yezono zabokhokho bawo. Kawamelanga avuke ukuba athathe ilizwe agcwalise umhlaba ngamadolobho awo.

22 “Ngizabavukela,” kutsho uJehova uSomandla. “Ngizakwesula iBhabhiloni labasindayo abantwabakhe lezizukulwana,” kutsho uJehova.

23 “Ngizalenza libe yindawo yezikhova lelizwe elilixhaphozi. Ngizalithanyela ngomthanyelo wencithakalo,” kutsho uJehova uSomandla.

Isiphrofetho nge-Asiriya

24 UJehova uSomandla ufungile wathi, “Ngeqiniso, njengoba sengilungisile, kuzakuba njalo, njalo njengoba ngikumisile kuzakuma kanjalo.

25 Ngizamchoboza um-Asiriya elizweni lami; ezintabeni zami ngizamnyathelela phansi. Ijogwe lakhe lizasuswa ebantwini bami, umthwalo wakhe ususwe emahlombe abo.”

26 Lokhu yikho okumiselwe umhlaba wonke, lesi yisandla eselulelwe ngaphezu kwezizwe zonke.

27 Ngoba uJehova uSomandla usenze isimiso, ngubani ongamvimbela na? Isandla sakhe siphakanyisiwe, Ngubani ongasibuyisela emuva na?

Isiphrofetho ngamaFilisti

28 Ilizwi leli lafika nyakana kusifa inkosi u-Ahazi:

29 Lingathokozi, lonke lina maFilisti, lisithi intonga eyalitshayayo yephukile; ngoba empandeni yenyoka leyana kuzavela inhlangwane, inzalo yayo izakuba yinyoka elobuthi obutshokayo.

30 Abangabayanga kubayanga bazathola amadlelo, abaswelayo bazalala phansi bevikelekile. Kodwa impande yakho ngizayitshabalalisa ngendlala; izabulala abaseleyo bakho.

31 Lila wena sango! Bubula wena dolobho! Chithekani lonke lina maFilisti! Iyezi lentuthu livela enyakatho; njalo akulamatshida eviyweni lalo.

32 Yimpendulo bani ezanikwa izithunywa zalelolizwe na? “UJehova useyakhile iZiyoni, abantu bakhe abahluphekileyo bazaphephela kuye.”